Затворениот руски опозициски лидер Алексеј Навални изјави дека против него е покрената нова истрага под обвинение за тероризам и дека ќе му суди воен суд кој би можел да го осуди на 30 години затвор.
За време на денешното рочиште, на кое Навални учествуваше преку видео-врска од затвор во Владимирската област, истражителот му рече дека ќе се соочи и со посебно воено судење за обвиненија за тероризам што потенцијално може да доведе до доживотен затвор.
Овој месец, руските истражители официјално ги поврзаа поддржувачите на Навални со убиството на воениот блогер Владлен Татарски, кој беше убиен во бомбашки напад во Санкт Петербург.
Соработникот на Навални, Иван Жданов, денеска изјави дека истражителите ги разгледуваат наводите за да ги поврзат со тој бомбашки напад и дека сослушувањето било одржано за да се разговара за подготовките за судењето на Навални под обвинение за екстремизам.
Најистакнатиот руски опозиционер беше осуден во март минатата година на девет години затвор за измама и непочитување на судот, што тој го опишува како политички мотивиран обид на руските власти да го задржат зад решетки што е можно подолго.
Судијата го затвори денешното рочиште за јавноста неколку минути по неговото започнување, велејќи дека станува збор за чувствителни информации.
„Тоа е обид незаконски да ја ограничам мојата способност да ги проучувам материјалите на случајот и да спречам некој да дознае за тоа“, рече Навални.
Сослушувањето заврши со тоа што судијата му даде десет дена на Навални да го проучи неговиот кривичен предмет, кој се состои од 196 списи на предметот.
Сѐ уште не е одреден датумот на судење.