Генералниот секретар на НАТО Јенс Столтенберг денеска изјави дека Северноатлантската алијанса го зголемила своето присуство во источниот дел на Алијансата и дека „руската инвазија на Украина“ не е изненадување.
Столтенберг на прес-конференција во Брисел по итниот состанок на амбасадорите на НАТО изјави дека повеќе од 100 авиони се ставени во борбена готовност.
– Веќе се преземени внимателни мерки за да се подготви одговорот на НАТО, во наредните денови ќе имаме дополнително присуство во источниот дел на Алијансата, активиран е одбранбениот механизам на НАТО што ни дава поголема слобода да ги движиме војниците и да ги испраќаме таму каде што е потребно – изјави Столтенберг на брифингот во Брисел.
– Ова што го правиме е одбранбено, не сакаме да дојде до конфликт – рече генералниот секретар на НАТО.
Тој предупреди дека Русија ја тресна вратата за политичко решение.
„Тоа е реалност која има сериозни безбедносни последици, па затоа го зголемивме нашето присуство во источниот дел на Алијансата“, рече Столтенберг.