НАТО денеска ќе одржи итен состанок поради експлозиите во источна Полска во близина на границата со Украина во кои загинаа две лица, соопштија двајца претставници на НАТО и еден европски дипломат, пренесува Радио Слободна Европа.
Со состанокот на амбасадорите на НАТО во Брисел ќе претседава генералниот секретар Јенс Столтенберг, кој потоа ќе одржи прес-конференција, се наведува во соопштението на НАТО.
Членката на НАТО Полска објави дека ракетата убила две лица во село на околу шест километри од границата со Украина.
Нема конкретни докази за тоа кој ги испукал ракетите, изјави полскиот претседател Анджеј Дуда.
Американскиот претседател Џо Бајден изјави претходно во средата дека проектилот веројатно не бил истрелан од Русија, по разговорите со лидерите на западните сојузници поради загриженоста дека конфликтот во Украина може да се прелее и во соседните земји.