Претседателката на Европската комисија, Урсула фон дер Лајен, денес на својот X профил објави дека „развојот на настаните во Иран е многу загрижувачки“, опишувајќи го нападот на Израел и САД врз Иран.
– Остануваме во близок контакт со нашите партнери во регионот и ја потврдуваме нашата цврста посветеност на зачувување на регионалната безбедност и стабилност. Обезбедувањето нуклеарна безбедност и спречувањето на какви било дејствија што би можеле дополнително да ги ескалираат тензиите или да го поткопаат глобалниот режим на неширење на нуклеарно оружје се од клучно значење – рече фон дер Лајен.
Таа потсети дека Европската Унија усвои обемни санкции како одговор на дејствијата на „убиствениот режим и Револуционерната гарда“ на Иран и постојано промовираше дипломатски напори насочени кон решавање на нуклеарните и балистичките програми преку договорено решение.
– Во тесна координација со земјите-членки на ЕУ, ќе преземеме сите потребни чекори за да обезбедиме граѓаните на ЕУ во регионот да можат да сметаат на нашата целосна поддршка. Ги повикуваме сите страни да покажат максимална воздржаност, да ги заштитат цивилите и целосно да го почитуваат меѓународното право – се наведува во X соопштението на претседателката на Европската комисија.