Судењето за предметот „Траекторија“ на СЈО во кој обвинети се поранешниот премиер Никола Груевски, поранешниот вицепремиер Владимир Пешевски, поранешниот министер за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски, е одложено за 26 декември.
Рочиштето е одложено бидејќи во истата судница денеска треба да продолжи судењето за случајот „Насилство во Центар“.
Претходно, одбраната на обвинетите побара одложување бидејќи немало услови за визуелно и тонско снимање поврзано со АКМИС системот.
Судијата Горан Бошевски го одби барањето на адвокатот Димитар Данго, со образложение дека судската расправа се снима визуелно и тонски со две камери и по завршувањето на рочиштето ќе биде изготвен ДВД запис што ќе им биде предаден на странките, и не треба да се објавува надвор од кривичната постапка. Тој додаде дека по секое рочиште видео и тонскиот запис се верификуваат во системот.
Одбраната побара и дополнително време за увид во доказите, на што обвинителката од СЈО Лиле Стефанова рече дека сите докази им се доставени на це-де во два наврата за време на истрагата за случајот, а имаат и транскрипти од „бомбите“. Посочи дека вкупно 315 телефонски разговори и СМС пораки се дел од доказите во овој предмет, а најголем дел од нив не се објавени во јавноста. Стефанова кажа дека обвинетите и одбраната имале можност да слушаат „бомбите“ во СЈО, но не го направиле тоа.
Обвинетите „Траекторија“ беа присутни на денешното рочиште. Во „Траекторија“ обвинети се Груевски, Пешевски, Јанакиески и поранешниот директор на Агенцијата за државни патишта, Љупчо Георгиевски. Тие се осомничени дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања. Со тоа, според СЈО, му нанеле штета на државниот буџет од најмалку 155 милиони евра и за истиот износ на компанијата изведувач ѝ овозможиле да се стекне со имотна корист.
Извор: МИА