Американската аеронаутичка и вселенска администрација (НАСА) им нареди на две компании – Axiom Space и Collins Aerospace – да развијат вселенски одела што идните астронаути ќе ги носат на Месечината, пренесува AFP.
Оделата ќе се користат и за Меѓународната вселенска станица (ISS), заменувајќи ги сегашните кои се во употреба околу 40 години.
„Во овие комбинезони (за астронаутите) ќе се пишува историја бидејќи ќе ги носи првата личност со темна кожа и првата жена што стапнала на Месечината“, изјави за новинарите Ванеса Вајче, директорка на вселенскиот центар Џонсон.
НАСА првично планираше сама да развие нови костуми, но тоа беше значително одложено. Одлуката оваа работа да им се довери на две компании потврдува дека агенцијата, како и последните години, систематски се определува за јавно-приватно партнерство.
Двете компании инвестираат значителна сума од своите пари, соопшти НАСА.
Детали од договорот се уште не се откриени, но програмата има „плафон“ од 3,5 милијарди долари за услугата што ќе се дава до 2034 година.
НАСА го задржува правото на крајот да избере само една од двете компании, или да се определи за двете, па дури и да додаде други. Сепак, компаниите ќе останат сопственици на оделата и ќе бидат одговорни за нивното одржување.
Аксиом Спејс, кој веќе испрати „вселенски туристи“ на Меѓународната вселенска станица со приватно вселенско летало SpaceX, планира да изгради сопствена вселенска станица, а сепак ќе има потреба од вселенски одела за идните клиенти.
„Планиравме да го направиме костумот како дел од нашата програма, па затоа е фантастично да се искористи долгогодишното искуство на НАСА“, рече шефот на компанијата Мајкл Сафрредини.
НАСА детално опиша голем број потреби и барања, како за оделата за работа на Месечината, така и за „модната линија“ за патувања во ниската орбита околу ISS.
Овие две средини не претставуваат ист предизвик за дизајнерите на костими бидејќи, на пример, тежината на оделото не е проблем во бестежинска состојба во орбитата околу Земјата, додека на Месечината мора да се земе предвид влијанието на прашината, пренесува Бета. .
Axiom Space и Collins Aerospace треба да одлучат дали да направат еден комбинезон за двете намени или две различни.
„Целта е да им се овозможи на оние кои носат костуми што е можно поголема мобилност“, резимира Ден Бурбенк од Колинс Аероспејс и самиот поранешен астронаут.