Најмалку 25 лица загинаа во ноќните напади низ Иран, додека двајца беа пронајдени мртви во израелскиот град Хаифа, а двајца беа пријавени како исчезнати во урнатините еден ден по иранскиот напад.
Американскиот претседател Доналд Трамп вчера ја засили заканата за напади врз критичната инфраструктура на Иран доколку владата на земјата не го отвори повторно Ормутскиот теснец до неговиот рок во вторник вечерта по време на Вашингтон.
Во нападот врз Технолошкиот универзитет Шариф во Техеран, беше предизвикан прекин на протокот на гас во дел од иранската престолнина, објави Би-Би-Си утрово.
Персиската служба на Би-Би-Си објави дека делови од универзитетот, вклучувајќи ја зградата на неговиот технолошки центар и универзитетската џамија, се чини дека се оштетени во нападот. Вчерашните снимки покажаа густ чад што се издига од различни области на Техеран.
Градоначалникот на населбата што го вклучува универзитетот рече дека гасот е привремено прекинат поради нападот.
На други места во Техеран, во воздушен напад врз станбена зграда загинаа 13 лица, објави Би-Би-Си.
Според Би-Би-Си, неколку универзитети во Иран се погодени од почетокот на војната, вклучувајќи го Техеранскиот универзитет за наука и технологија и Универзитетот Шахид Бехешти.
Израелските спасувачки служби утрово известија дека неколку локации биле погодени од ракети лансирани од Иран кон неколку градови во центарот на Израел.
Во Петах Тиква, службите за итни случаи ѝ пружиле помош на жена во критична состојба со рана од шрапнел во градите и ја евакуирале во болницата Беилинсон.
Пожарникарите во тој град гасат запалени возила и продолжуваат да бараат евентуално заробени лица под урнатините.
Во Тел Авив, маж лесно повреден од шрапнел бил евакуиран во болницата Ишилов.
Спасувачката служба Маген Давид Адом прикажа снимки од станбени згради оштетени во нападот.
Израелската војска утрово ја предупреди јавноста за уште еден бараж од ракети од Иран, во четвртото такво предупредување денес.
Израелските служби Маген Давид Адом и противпожарните и спасувачки служби рано утрово соопштија дека има извештаи за ирански ракети кои погодиле неколку локации во северниот град Хаифа.
На едно место, четири лица, меѓу кои и две деца, беа полесно повредени.
Ракетните напади погодија станбени области и фабрика во тој град. Фабриката беше погодена од шрапнели од пресретнувањето на ракетата.
Агенцијата АП наведува дека не е јасно дали сите погодени локации се предизвикани од шрапнели од пресретнувањето или од директни удари.
Сликите од погодените области покажуваат пожари и уништени автомобили во станбена област.
Овие ракетни напади се случија еден ден откако напад од Иран, исто така, погоди станбена населба во Хаифа, при што загинаа две лица, а други беа повредени. Две лица сè уште се водат како исчезнати под урнатините по вчерашниот напад.