Најмалку 15 лица загинаа во лизгање на земјиштето по обилните дождови во хималајската држава Утаракханд во северна Индија, додека 16 лица се водат како исчезнати, објавија локалните медиуми утрово.
Снимките од местото на настанот покажуваат лизгање на земјиштето низ градот Сахастрадара во округот Дехрадун, уништувајќи продавници, патишта и домови додека жителите барале засолниште, објави Ројтерс.
Досега, спасувачите извлекле 13 тела од Дехрадун, и по едно тело од областите Питорагарх и Наинитал, објави „Индијан експрес“.
Властите и спасувачките екипи продолжуваат да бараат исчезнати лица.
Утаракханд често е погоден од поплави и лизгање на земјиштето, а експертите веруваат дека климатските промени се клучен фактор што придонесува за зачестеноста на овие природни катастрофи.
Во август, слично лизгање на земјиштето го погоди селото Дарали, каде што повеќе од 60 лица исчезнаа откако пороите го поплавија подрачјето.