Три лица загинаа, а 13 се повредени во налетот на тајфунот Каџики, објавија денес виетнамските власти.
Тајфунот се упати кон копното од морето во понеделник, со ветрови што достигнаа брзина од 130 километри на час, корнејќи покриви од илјадници домови и прекинувајќи ја електричната енергија за повеќе од 1,6 милиони луѓе.
Силните дождови ја погодија земјата денес. Властите предупредија на можни ненадејни поплави и лизгање на земјиштето во осум провинции.
Научниците известуваат дека климатските промени предизвикани од човекот доведуваат до поинтензивно и непредвидливо време, зголемувајќи го ризикот од поплави и бури, особено во тропските региони.
Откако го погоди Виетнам, Каџики ослабе и сè уште се движи кон северниот дел на Лаос со обилни дождови.
Во Виетнам, повеќе од 100 луѓе загинаа или исчезнаа како резултат на природни катастрофи во првите седум месеци од оваа година, според податоците од Министерството за земјоделство.