Потрагата по летот MH370 на „Малезија ерлајнс“ треба да продолжи на 30 декември, повеќе од една деценија откако авионот исчезна со 239 лица во него во една од најголемите мистерии во историјата на авијацијата.
Потрагата беше започната претходно оваа година од „Оушн Инфинити“, компанија за морска роботика со седиште во Велика Британија и САД, но беше откажана во април поради лоши временски услови.
Малезиското Министерство за транспорт овој месец објави дека пребарувањата на морското дно ќе се спроведуваат повремено во текот на 55 дена, почнувајќи од 30 декември.
„Оушн Инфинити“ склучи договор „без пронаоѓање, без надомест“ со Малезија, според кој компанијата ќе пребарува нова област од океанот со површина од 15.000 квадратни километри, а износот од 70 милиони долари ќе биде исплатен само ако се пронајдат остатоците од авионот.
Компанијата не сакаше да коментира за најновото пребарување.
На летот имаше 227 патници и 12 членови на екипажот
Летот MH370 отстапил од планираната рута и исчезнал од радарот за контрола на воздушниот сообраќај за време на летот од Куала Лумпур до Пекинг на 8 март 2014 година.
Авионот превезувал 12 членови на екипажот од Малезија и 227 патници, од кои повеќето биле од кинеска националност.
Меѓу патниците имало 38 Малезијци, седум австралиски државјани, како и државјани на Индонезија, Индија, Франција, Соединетите Американски Држави, Иран, Украина, Канада, Нов Зеланд, Холандија, Русија и Тајван.
Исчезнувањето на авионот доведе до едно од најголемите подводни пребарувања во светот.
Мултинационалната операција, во која учествуваа Малезија и Кина, беше предводена од Австралија и опфатила повеќе од 46.330 квадратни милји морско дно во оддалечен дел од јужниот Индиски Океан.
Потрагата заврши во јануари 2017 година.
Во извештај објавен подоцна истата година, австралиските истражители забележале дека неможноста да се дадат одговори на семејствата на жртвите е голема трагедија и речиси незамислива во модерното време.
Во 2018 година, „Оушн Инфинити“ спроведе уште едно пребарување, кое траеше три месеци, но исто така не даде резултати.
Со текот на годините, парчиња остатоци беа пронајдени по должината на брегот на Африка и на островите во Индискиот Океан, од кои за некои беше потврдено дека припаѓаат на исчезнатиот авион.
Овие наоди беа искористени во анализите на движењето на океанските струи за да се стесни можната област на падот на авионот, пишува „Гардијан“.
„Очајно бараме јасност и мир“
Официјална истрага од 2018 година утврди дека авионот не летал на автопилот и дека не може да се исклучи можноста за „нелегално мешање од трета страна“.
Во исто време, теориите дека пилотот и копилотот намерно го урнале авионот, како и можноста за технички дефект, беа отфрлени.
Членовите на семејствата на жртвите со години нагласуваат дека одговорите се неопходни за да се спречи нова трагедија и го поздравија обновеното пребарување.
Даница Викс, чиј сопруг Пол, австралиски државјанин, беше меѓу патниците, овој месец изјави дека нејзиното семејство „никогаш не престанало да бара одговори“.
„Искрено се надевам дека оваа следна фаза конечно ќе ни донесе јасност и мир за кои ние и нашите најблиски очајно копнееме од 8 март 2014 година“, рече таа.