Комесарот за одбрана на Европската Унија, Андриус Кубилиус, изјави дека на ЕУ ѝ е потребна воена сила од 100.000 војници и рече дека Унијата треба да го реформира начинот на кој се справува со одбраната на политичко ниво и дека Обединетото Кралство треба да добие место во одбраната на ЕУ.
Тој посочи дека во „светлото на руската агресија врз Украина“ и напорите на САД да го загрозат Гренланд, тој е за нов дизајн на заедничката одбрана на Европа, објавува Политико.
„Дали Соединетите Американски Држави би биле воено посилни ако имаа 50 армии на државно ниво наместо една федерална армија? Педесет одбранбени политики и буџети на државно ниво, наместо една федерална одбранбена политика и буџет. Ако нашиот одговор е не, Соединетите Американски Држави не би биле посилни, тогаш што чекаме“, рече Кубилиус на безбедносната конференција одржана во недела во Шведска.
Кубилиус рече дека одбранбената подготвеност на Европа зависи од три фактори: повеќе инвестиции во производствени капацитети, институции кои се подготвени и организирани и политичка волја за одвраќање и, доколку е потребно, борба против потенцијални непријатели.
Според него, само зголемувањето на финансирањето за постојниот одбранбен систем на Европа нема да ги исполни овие барања.
„Мора да почнеме да ги инвестираме нашите пари на начин што ќе ни овозможи да се бориме како Европа, а не само како група од 27 национални бонсаи армии. Жан-Клод Јункер, Емануел Макрон и Ангела Меркел веќе предложија моќна, постојана европска воена сила од 100.000 војници пред 10 години“, заклучи Кубилиус.