Петгодишниот Велес Пашник почина во саботата во украинскиот град Лавов откако паднал во кома при вадење на млечни заби под општа анестезија.
Момчето доживеало срцев удар кога паднало во кома при вадење на два млечни заба во една од стоматолошките клиники.
Лекарите успеале да го реанимираат и веднаш бил префрлен на одделението за интензивна нега, каде подоцна била констатирана мозочна смрт, јавува Слободна Далмација.
Детето било во кома 37 дена.
„Летај, момче наше, летај, биди наша светлина од небото. Почивај во мир драг наш Лесоњо“, напиша таткото на момчето Виктор Пашник на својот профил на социјалните мрежи.
Таткото претходно на социјалните мрежи ги опиша деталите за трагедијата што се случи на 8 декември.
„Вработените во стоматолошкиот центар понудија да се изврши хируршка интервенција за вадење млечни заби под општа анестезија. Детето на денот на операцијата многу негодуваше во операционата сала, одби да му стави маска, како да ја насетуваше трагедијата што се приближува. Анестезиологот насилно му стави маска пред мојата сопруга. Сопругата го замолила да престане, но анестезиологот не ја послушал и продолжил да ја притиска маската, по што Велес заспал“, вели таткото.
По некое време мајката слушнала гужва во операционата сала.
„Почнаа да се собираат медицински работници, а по дваесетина минути пристигнаа две екипи на брзата помош. Директорот на клиниката ѝ кажа на сопругата дека на детето му престанало срцето за време на операцијата, која лекарите успеале да ја рестартираат, а Велес бил пренесен во болница. Таму од докторот дознавме дека неговата состојба е критична и дека е во тешка состојба.
Ни кажаа и дека за време на операцијата на забите нашиот син бил клинички мртов и дека лекарите предолго чекале за реанимација. По следниот преглед докторот заклучил дека мозокот на детето е мртов и дека само апаратите го одржуваат во живот“, вели таткото.
Според неговите зборови, семејството било особено погодено од постапката на лекарот од стоматолошката амбуланта.
„Незаинтересираноста на раководството на стоматолошкиот центар за нашата тага се огледа и во тоа што не ни го даваат највредното нешто што остана од нашиот син, двата мали заба извадени при операција, а кои ни се драги. затоа што му припаѓаат на нашиот син…“.
Велес имаше две сестри.
Полицијата поведе кривична постапка за непрофесионално вршење на професионалната должност од страна на здравствените работници.
Обвинетиот се соочува со затворска казна до три години или ограничување на слободата до пет години со лишување од правото да врши одредени функции или да се занимава со одредени дејности до три години, пишува Слободна Далмација.
Директорот на клиниката „Ори-Дент“ Роман Ониско за локалните медиуми изјави дека соработуваат со истрагата.
Во моментов лекарите кои беа вклучени во укажувањето лекарска помош се суспендирани од должност до завршување на истрагата“, рече Ониско.