Младите Германци се акутно подложни на чувството на осаменост во современото општество, штотуку беше објавено ново истражување, а германската влада започна кампања оваа недела за да го истакне проблемот.
„Кој знаеше дека помладите се меѓу најосамените по коронавирусот, ова конечно заслужува внимание“, рече по тој повод министерката за семејни прашања Лиза Паус.
„Треба сериозно да ја сфатиме осаменоста, вклучително и онаа на младите, и да преземеме акција“, рече Паус, истакнувајќи дека ова прашање влијае и на политичкото учество и, на крајот, на демократијата.
Според студијата на Фондацијата Бертелсман, независен тинк-тенк во северозападниот град Гетерсло, речиси половина од 16-30-годишниците во Германија се чувствуваат осамено.
Повеќе од една третина (35 проценти) од 2.532 испитаници во оваа возрасна група рекле дека се „умерено“ осамени, додека 10 проценти рекле дека се „многу осамени“.
Како одговор на тоа прашање, започна кампањата поддржана од владата наречена „Заедно надвор од осаменоста“, која ќе трае до недела, а планирани се многу различни настани низ целата земја.
„Осаменоста не ги погодува само постарите лица“
Во споредба со студиите спроведени во 2021 и 2023 година, малку помалку млади луѓе сега пријавуваат дека се социјално и емоционално осамени.
Сепак, високото рангирање на младите во проценката на осаменоста бара преиспитување, истакнуваат авторите на студијата.
„Осаменоста повеќе не е феномен кој ги погодува само постарите луѓе. Во последните години стана јасно дека и младите се повеќе погодени од осаменоста и затоа претставуваат нова ризична група“, вели Ања Лангнес од фондацијата Бертелсман.
Неколку други неодамнешни студии, исто така, ја опишаа осаменоста кај младите како проблем, пренесува агенцијата Дпа.
Одамна е познато дека осаменоста, за оние кои се погодени од неа, е исто толку штетна како на пример пушењето, дебелината или аерозагадувањето, рече министерот Паус говорејќи за овој проблем.
Но, помалку е познато дека тоа има и индиректно негативно влијание врз демократијата.
„Оние кои ја губат довербата во општеството ја губат и довербата во демократијата, политичкото учество се намалува, како и волјата за глас“, рече министерот, тврдејќи дека „осаменоста е потценета појава“.