Телата на 23 Рохинџи кои избегаа од мјанмарската држава Ракин се извлечени откако нивниот брод потона.
Триесет други се уште се водат како исчезнати, додека осум лица наводно ја преживеале несреќата.
Преживеаните рекле дека се обидувале да стигнат до Малезија кога нивниот брод со повеќе од 50 патници потонал и екипажот го напуштил во неделата.
Секоја година, илјадници Рохинџи се обидуваат да го направат опасното патување по море до Малезија или Индонезија.
Тие бегаат од прогонот во Мјанмар и од преполните бегалски кампови во Бангладеш.
Меѓу загинатите оваа недела има 13 жени и 10 мажи, сите Рохинџа муслимани, изјави спасувачкиот тим за Би-Би-Си.
Муслиманските Рохинџи се етничко малцинство во мнозинскиот будистички Мјанмар.
Многумина од нив побегнаа во Бангладеш во 2017 година за да избегаат од кампањата на геноцид од страна на бурманската војска. А оние кои останаа во Мјанмар се обидуваат да избегаат од 2021 година, кога имаше воен удар.
Преживеаните од потонувањето на бродот оваа недела се сеќаваат дека биле погодени од голем бран во близина на главниот град на Ракин, Ситве.
Тие велат дека шверцерите, на кои им биле платени околу 4.000 долари по човек за да патуваат во Малезија, потоа го напуштиле бродот.
Телата на жртвите биле подигнати од други бродови или исфрлени на плажа покрај морето.
Долгото патување низ Андаманското Море со преполни рибарски чамци е секогаш опасно, но особено во овој период од годината, во екот на сезоната на монсунските бури.
Повеќето Рохинџи се обидуваат да преминат помеѓу октомври и мај.
Тие се подготвени да преземат ризици – и честопати ги продаваат своите единствени средства, како што е земјата, за да го финансираат патувањето – поради немилосрдно мрачните услови во кои се принудени да живеат, или како бегалци во ужасно преполните кампови преку границата во Бангладеш, или подложени на дискриминација и ограничувања на нивното движење во Мјанмар.