Министрите за финансии на земјите од Г7 вчера објавија дека ќе преземат заеднички чекори за зголемување на притисокот врз Русија, таргетирајќи ги оние земји што продолжуваат да купуваат руска нафта.
Министрите ја нагласија важноста на трговските мерки, вклучувајќи царински давачки и забрани за увоз и извоз, со цел намалување на руските приходи поради агресијата врз Украина. Заедничката изјава беше објавена по видеоконференција.
Соединетите Американски Држави претходно ги повикаа сојузниците во НАТО да воведат тарифи за земјите што купуваат руска нафта, како што се Индија и Кина.
Иако американскиот претседател Доналд Трамп се воздржа од воведување дополнителни тарифи за Кина, неговата администрација воведе нови тарифи за увоз од Индија.
Земјите-членки на Г7 (САД, Канада, Велика Британија, Франција, Германија, Италија и Јапонија) не ги именуваа Кина или Индија во својата изјава.
„Ќе ги таргетираме оние што продолжуваат, директно или индиректно, да купуваат руска нафта дури и по инвазијата на Украина“, се вели во соопштението.
„Ќе преземеме конкретни мерки за значително да го намалиме преостанатиот увоз од Русија, вклучително и увозот на енергетски производи“, се додава во соопштението.
Министрите за надворешни работи на Г7, исто така, рекоа дека сериозно разгледуваат трговски мерки и други ограничувања за земјите што помагаат во финансирањето на воените напори на Русија. Во соопштението не беше спомената ниедна конкретна земја.