Министрите за надворешни работи на Г7 во средата ги повикаа шиитските бунтовници од племето Хути во Јемен „веднаш да го запрат“ загрозувањето на поморскиот сообраќај и да го ослободат екипажот на товарниот брод киднапиран во Црвеното Море пред 10 дена.
– Ги повикуваме сите страни да не го загрозуваат или спречуваат правото и слободата на пловидба на сите бродови. Конкретно, ги повикуваме Хутите веднаш да престанат со нападите врз цивили и заканите за меѓународните водни патишта и трговските бродови и да го ослободат бродот M/V Galaxy Leader и неговиот екипаж киднапирани на 19 ноември – стои во соопштението на Г7.
Хутите, сојузници на Иран, го киднапираа трговскиот брод и неговиот 25-член екипаж како одмазда за израелската војна против Хамас во Газа, предизвикана од невидениот крвав напад на исламистичкото движење врз Израел на 7 октомври.
Бродот Galaxy Leader е управуван од јапонска компанија, но припаѓа на британска бродска компанија во сопственост на израелски претприемач.
Обидот за киднапирање на M/V Central Park, танкер во сопственост на компанија поврзана со Израел, заврши неславно во неделата во Заливот по интервенцијата на американскиот разурнувач USS Mason.
Приведени се петмина напаѓачи осомничени дека се сомалиски пирати.
Минатиот петок, брод, исто така поврзан со Израел, беше оштетен во Индискиот Океан од иранско производство на беспилотно летало Шахед.