Министрите за надворешни работи и одбрана од земјите-членки на Европската унија се состануваат во вторник во Брисел за да разговараат за тековниот конфликт во Украина, одбранбените капацитети на блокот и војната на Блискиот Исток.
Шефовите на дипломатиите треба официјално да го одобрат 17-тиот пакет санкции на Европската Унија против Москва поради војната на Русија во Украина, а тие ќе се фокусираат на таканаречената руска флота во сенка.
Станува збор за бродови што пловат под знамиња на трети земји, кои Русија ги користи за да избегне санкции.
Лични санкции како што се забраната за влез во Европската Унија и замрзнувањето на средствата се предвидени во повеќе од десет случаи.
Исто така, постојат планови за казнување на неколку десетици компании вклучени во заобиколување на руските санкции.
Разговори за Газа и Сирија
Се очекува украинскиот министер за надворешни работи Андриј Сибиха да се сретне со своите европски колеги преку видео врска откако разговорите меѓу украинските и руските претставници за прекин на огнот предложен од Киев не дадоа конкретни резултати.
Министрите за надворешни работи ќе разговараат за најновите случувања на Блискиот Исток, вклучувајќи ги Појасот Газа и Сирија.
Министрите за одбрана ќе започнат со дискусија за воената поддршка на Унијата за Украина, која е разорена од војна.
Украинскиот министер за одбрана Рустем Умеров ќе се приклучи на разговорите преку видео врска, а се очекува и генералниот секретар на НАТО, Марк Руте, да присуствува на состанокот во Брисел, пренесува Хина.
Министрите за одбрана ќе разговараат и за тоа како да се подобрат европските одбранбени капацитети и да се зголемат воените трошоци, вклучително и предлог за фонд за одбрана од 150 милијарди евра.