Министерот за одбрана на САД, Пит Хегсет, се обраќа на јавноста. Тој изјави дека нападите на САД врз Иран не се насочени кон „промена на режимот“, иако призна дека раководството во таа земја се променило.
„Ова не е таканаречена војна за промена на режимот, но режимот сигурно се променил и светот е подобар поради тоа“, рече Хегсет на прес-конференција во Пентагон.
Министерот, исто така, потврди дека САД не ја започнале војната, тврдејќи дека Иран со децении извршувал напади во она што го нарече „еднострана војна против Америка“.
„Ние не ја започнавме оваа војна, но под претседателот Трамп ја завршуваме“, додаде Хегсет.
„Војната против Иран не е Ирак, ние нема да се вклучиме во долгорочно градење држава“
Министерот за одбрана на САД, Пит Хегсет, рече дека војната против Иран не е споредлива со војната во Ирак и дека САД нема повторно да се најдат во долгиот процес на градење на нацијата низ кој поминаа пред две децении.
„Ова не е Ирак“, рече Хегсет од Пентагон. „Ова не е бесконечно. Јас бев таму во двата случаи. Нашата генерација знае подобро, а исто така и овој претседател. Тој ги нарече последните 20 години војни за градење држави глупави и е во право.“
„Ова е спротивното“, додаде тој. „Оваа операција е јасна, разорна и одлучувачка мисија: уништување на ракетната закана, уништување на морнарицата, без нуклеарно оружје.“
Министерот за одбрана на САД рече дека земјата ги оплакува четворицата припадници на вооружените сили кои досега загинаа во операциите против Иран, додавајќи дека тие биле „најдобрите од Америка“.
„Да го поминеме остатокот од оваа операција на начин што им оддава почит, без извинување, без двоумење, со епски бес“, додаде тој.
Им се обрати на војниците: Вие сте најсмртоносната сила што светот некогаш ја видел.
Зборувајќи директно до војниците, Хегсет рече: „Ова е генерациската пресвртница што ја чекавме.“
„Останете фокусирани, нашиот врховен командант е цврсто на чело. Се соочуваме со решителен непријател, но вие сте подобри. Но, ние мора да го докажуваме тоа секој ден. На историјата не ѝ е гајле дали сме уморни, исплашени или дали борбата ни изгледа голема“, рече тој.
„Ние повеќе не сме бранители, сега сме воини. Обучени да го убиеме непријателот и да ја скршиме неговата волја. Историјата гледа, бидете силата за која се заколнавте дека ќе бидете, фокусирана, дисциплинирана, убиствена и непоколеблива. Ќе завршиме според условите на „Америка на прво место“, кога претседателот Трамп ќе одлучи. Никој друг. Како што треба да биде“, рече тој.
Тој рече дека тој и претседателот Трамп „секогаш им го чуваат грбот“ и дека тие се најсилната и најсмртоносната борбена сила што светот некогаш ја видел.