Германската канцеларка Ангела Меркел во петок се среќава со рускиот претседател Владимир Путин во Кремљ, точно една година откако критичарот на Путин, Алексеј Навални, беше нападнат со отровот новичок.
Навални (45) е во затвор и го смета Путин за одговорен за обидот за убиство на 20 август 2020 година.
Германија бара од Русија да испита напад со хемискиот отров новичок.
Москва го обвинува Западот за клевета и бара докази дека Навални бил отруен од новичок.
Навални беше уапсен во Москва на 17 јануари по враќањето од Германија, каде што беше на лекување, каде што и се сретна со Меркел.
Тој сега ја издржува казната во затворски камп, бидејќи, според пресудата, ги прекршил барањата за пријавување во Русија за време на неговиот престој во Германија. Меркел постојано бараше да биде ослободен.
Неговиот случај е само еден во низата прашања што во голема мера влијаат врз односите меѓу двете земји.
ЕУ воведе санкции против Русија поради нападот врз Навални, кој предизвика меѓународна осуда, како и поради хакерскиот напад врз германскиот парламент во 2015 година и поради конфликтот во Украина.
Меркел и Путин ќе разговараат и за контроверзниот гасовод „Северен тек 2“, кој треба да биде завршен овој месец. Покрај тоа, најверојатно ќе се разговара за Авганистан и Белорусија.
Меркел последен пат беше во Москва во јануари 2020 година.
Таа, исто така, планира да положи венец на гробот на непознат војник во Кремљ, 80 години откако Хитлеровата Германија го нападна Советскиот Сојуз.