Илон Маск го нарече полскиот министер за надворешни работи Радослав Сикорски „лигав имбецил“ откако Сикорски сподели извештај од Американскиот институт за проучување на војната (ISW) дека руските сили сè повеќе користат сателити Starlink за насочување на напади со беспилотни летала во Украина.
Според ISW, руските сили ги опремуваат беспилотните летала, вклучувајќи ги моделите BM-35, Shahed и Molniya, со системи Starlink за да го зголемат нивниот дострел и точност.
Беспилотните летала опремени со Starlink можат да погодат поголем дел од Украина и да стигнат до делови од Молдавија, Полска, Романија и Литванија ако бидат лансирани од територија контролирана од Русија.
Откако го сподели извештајот, Сикорски напиша на X:
„Еј голем човеку, зошто не ги спречиш Русите да го користат Starlink за да ги таргетираат украинските градови? Заработувањето пари од воени злосторства може да му наштети на твојот бренд“.
Маск остро одговори, нарекувајќи го Сикорски „лигав имбецил“ и бранејќи го Starlink како „’рбет на украинските воени комуникации“.
Претходни дискусии
Маск и Сикорски со години јавно се расправаат за улогата на Старлинк во војната во Украина.
Во октомври минатата година, Маск коментираше за можноста за ограничување на пристапот на Украина до сателитската мрежа.
На X, тој напиша во тоа време: „Мојот систем Старлинк е ‘рбетот на украинската војска. Целата нивна фронтовска линија ќе се сруши ако ја исклучам“.
Сикорски одговори со предупредување: „Ако SpaceX се покаже како несигурен снабдувач, ќе бидеме принудени да бараме други добавувачи“.
Тој додаде дека Полска плаќа 50 милиони долари годишно за услугите на Старлинк што ги користи Украина.
Потоа Маск одговори со порака: „Замолчи, мал човеку. Плаќаш само дел од цената. И нема замена за Старлинк“.
Американскиот шеф на дипломатијата, Марко Рубио, исто така се приклучи на дебатата, велејќи:
„Никој не се закани дека ќе ја исклучи Украина од Старлинк“, и обвинувајќи го Сикорски за ширење дезинформации.
Рубио додаде дека без Старлинк, „Украина одамна ќе ја изгубеше оваа војна, а Русите сега ќе беа на границата со Полска“.
Маск постојано ја бранеше својата технологија
Од почетокот на целосната руска инвазија во 2022 година, Starlink е клучна алатка за комуникација за Украина, поврзувајќи ги трупите на бојното поле и ослободените области.
Маск постојано ја бранеше својата технологија, тврдејќи дека е неопходна за функционирање на украинската војска.
Перцепцијата дека Starlink е единствениот провајдер способен за одржување на сателитски комуникации за Украина, исто така, влијаеше на пазарот.
Акциите на француско-британскиот сателитски оператор Eutelsat, кој се споменува како можна алтернатива, пораснаа за 650 проценти на почетокот на март 2025 година, што го одразува интересот на инвеститорите за сателитски комуникации во контекст на војна.