Францускиот претседател Емануел Макрон во средата изјави дека Париз може да ја признае палестинската држава во јуни, додавајќи дека за возврат некои земји од Блискиот Исток би можеле да го признаат Израел.
„Мораме да тргнеме кон признавање (палестинската држава). И тоа ќе го направиме во следните неколку месеци. Не го правам за да му угодам на никого. Ќе го направам затоа што во одреден момент ќе биде фер“, рече Макрон на телевизијата Франс 5, пренесува Хина.
„И бидејќи јас исто така сакам да учествувам во колективната динамика, тоа исто така ќе им овозможи на оние кои ја бранат Палестина да го признаат Израел за возврат, нешто што многу од нив не го прават“, додаде Макрон.
Иако речиси 150 земји ја признаа Палестина, повеќето западни сили не ја признаа, вклучувајќи ги САД, Велика Британија, Франција, Германија и Јапонија.
Меѓу земјите кои не го признаваат Израел се Иран, Сирија, Јемен и Саудиска Арабија.
„Нашата цел е да претседаваме со конференција во јуни, заедно со Саудиска Арабија, каде би можеле да го финализираме планот за меѓусебно признавање“, рече Макрон.
Во јуни, Макрон организира конференција за решение за две држави со саудискиот принц Мохамед бин Салман, а тој собир, според дипломатски извори, може да биде „поволниот момент“ што Франција го чека за на крајот да ја признае палестинската држава.
За време на неговата посета на Египет, Макрон во понеделникот разговараше со претседателот Абдел Фатах ал-Сиси за политичките аспекти на посетата, со акцент на Појасот Газа.
Во таа прилика тој го поддржа арапскиот план за Газа, „силно спротивставувајќи се на преселувањето“ предложено од Доналд Трамп, но го поддржа ставот на Трамп дека исламистичкиот Хамас во иднина не смее да игра никаква улога во таа палестинска енклава.
Макрон го поддржа арапскиот план за обнова на Газа како „реален“ и кој, за разлика од американскиот план, не предвидува раселување на жителите на Газа.
Сепак, Макрон посочи и дека овој план треба „дополнително да се зајакне“ во однос на „безбедноста“ и „управувањето“ со таа палестинска територија.
„Хамас не смее на кој било начин да учествува во управувањето и повеќе не смее да претставува никаква закана за Израел“, инсистираше Макрон во неговиот разговор со Ал Сиси.