Францускиот претседател Емануел Макрон не успеа да обезбеди политичка поддршка за испраќање француски воен контингент во Украина по завршувањето на конфликтот, објавува парискиот весник „Ле Монд“.
Според весникот, на затворен состанок во Елисејската палата, Макрон се обидел да ги убеди претставниците на парламентарните партии, како и врвните воени функционери, да ја поддржат идејата за распоредување француски војници во постконфликтна Украина.
Средбата траела речиси три часа, но иницијативата не ја добила потребната поддршка.
Според „Ле Монд“, на состанокот присуствувале премиерот Себастијан Лекорну, министерката за одбрана Катрин Вотрен, началникот на Генералштабот на француската армија, генерал Фабиен Мандон, како и претседателите на Националното собрание и Сенатот.
Отпор кон предлогот на Макрон дошол од неколку страни на политичкиот спектар.
Шефицата на левичарската фракција „Бунтовничка Франција“, Матилда Пано, изјавила дека нејзината партија ќе го поддржи евентуалното распоредување војници само со јасен мандат од Обединетите нации.
Сличен став изрази и лидерката на десничарскиот Национален собир, Марин Ле Пен.
Се потсетува дека кон крајот на декември, германскиот весник „Велт“ објави дека Велика Британија и Франција наводно разработиле планови за распоредување на вооружени сили по линијата на контакт меѓу Русија и Украина со цел да се следи евентуалното примирје.
Според тие изјави, контингентот би броел помеѓу 10.000 и 15.000 војници и би бил подготвен да интервенира во случај на прекршување на договорот.
Во исто време, германскиот канцелар Фридрих Мерц објави дека Берлин размислува за распоредување на своите сили во близина на Украина, но на територијата на земјите-членки на НАТО, нагласувајќи дека германската влада и парламентот ќе одлучат за обемот и видот на ангажманот.
Москва, сепак, остро се спротивставува на какво било сценарио што вклучува присуство на трупи на НАТО на украинска територија.
Портпаролката на руското Министерство за надворешни работи, Марија Захарова, го повика Лондон да се откаже од она што го нарече „ризични и неодговорни геополитички потези“ и да не се меша во преговорите меѓу Москва и Вашингтон.
Рускиот претседател Владимир Путин претходно истакна дека сите странски трупи што би можеле да бидат распоредени во Украина би претставувале легитимна цел за руската армија.