Сајбер нападите на руските хакери поддржани од нивната земја уништија податоци во десетици организации во Украина и создадоа „хаотична информативна средина“, соопшти Мајкрософт.
Во извештајот од 20 страници, цитиран од АП, единицата за дигитална безбедност на Мајкрософт, се наведува дека речиси половина од деструктивните напади биле извршени врз клучната украинска инфраструктура, многу пати истовремено со бомбардирања и ракетни напади од страна на руските сили.
Мајкрософт рече дека групите кои работат во хармонија со Русија „се позиционираа за конфликтот во март 2021 година“, упаднаа во мрежи и создавајќи упоришта кои подоцна ќе се користат за собирање стратешки разузнавачки информации, како и податоци од бојното поле или за овозможување идни деструктивни напади.
Распространети разузнавачки активности
За време на војната во Украина, руските сајбер напади „повремено не само што ги деградираа функциите“ на одредени организации, туку се обидоа да „го нарушат пристапот на граѓаните до доверливи информации и услуги од суштинско значење за животот и да ја поткопаат довербата во раководството на земјата“, се вели во извештајот.
Сајбер операциите на Кремљ „имаа влијание во смисла на техничко нарушување на услугите и хаотично информациско опкружување, но Мајкрософт не може да го процени нивното пошироко стратешко влијание“, се додава.
Прекините предизвикани од руските хакерски активности беа поскромни отколку што многумина предвидуваа пред инвазијата на 24 февруари, а Мајкрософт рече дека нападите биле „придружени со широко распространета шпионажа и разузнавачка активност“.