Венецуелскиот претседател Николас Мадуро најави распоредување на 4,5 милиони припадници на милицијата во земјата како одговор на „заканите“ на САД за распоредување на американски воени сили во Карибите.
„Оваа недела ќе активирам посебен план со повеќе од 4,5 милиони припадници на милицијата за да се гарантира покриеност на целата национална територија. Подготвени, активирани и вооружени милиции“, рече Мадуро на јавната телевизија во понеделник вечерта.
САД ја удвоија наградата за неговото апсење на 50 милиони долари
Според официјални извори, милицијата основана од покојниот претседател Уго Чавез, кого Мадуро го наследи, се состои од околу пет милиони луѓе, и цивили и резервисти, и е под команда на војската.
Осврнувајќи се на „скапаниот аргумент со екстравагантни, луди и глупави закани“ на САД, Мадуро рече дека „оружјето и ракетите треба да им се дадат на селанските сили, за да ја бранат територијата, суверенитетот и мирот на Венецуела, како и на работничката класа за да ја бранат татковината“.
Американскиот државен секретар Марко Рубио минатата недела објави распоредување на американски поморски и воздухопловни сили во Карибите за операции против дрога, кратко откако американската администрација ја удвои наградата за Мадуро, обвинет дека е дел од картелот.
„Ние сме распоредени и низ целиот Кариб кој ни припаѓа, на нашето море, имот, венецуелска територија“, одговори венецуелскиот министер за внатрешни работи Диосдадо Кабело.