Луис Инасио Лула да Силва победи во вториот круг од претседателските избори против Жаир Болсонаро, кој не успеа да го освои вториот мандат.
Левичарскиот кандидат Лула освои 50,83 отсто од гласовите, наспроти 49,17 отсто за десничарскиот Жаир Болсонаро, откако беа преброени нешто помалку од 99 отсто од гласовите, потврди Врховниот изборен суд на Бразил.
Според првите резултати, Болсонаро беше во водство, но Лула го стигна и го претекна, со оглед на тоа што Работничката партија на Лула добива се посилна поддршка во регионите кои побавно ги објавуваат резултатите.
Изборите служат како референдум за две сосема различни – и жестоко спротивставени – визии за иднината на Бразил.
Болсонаро вети дека ќе го консолидира остриот пресврт надесно во бразилската политика по претседателството во кое беше забележана една од најсмртоносните епидемии во светот на пандемијата „Ковид-19“ и широко распространето уништување на шумите во сливот на Амазон.
Лула ветува поголема општествена и еколошка одговорност, наведувајќи го зголемениот просперитет на неговото претседателствување во периодот 2003-2010 година, пред корупциски скандали да ја оцрнат неговата Работничка партија.
Околу 120 милиони гласачи беа поканети да го дадат својот глас во електронските гласачки машини кои Болсонаро ги критикуваше без докази дека се склони кон измама, предизвикувајќи загриженост дека можеби нема да го признае поразот, по примерот на неговиот идеолошки сојузник, поранешниот американски претседател Доналд Трамп.
Тоа ги зголеми тензиите на најполаризираните избори во Бразил од неговото враќање во демократијата во 1985 година по воената диктатура на која се бореше Лула, како поранешен синдикален лидер, а Болсонаро како поранешен армиски офицер.