Претседателот на Белорусија, Александар Лукашенко, изјави дека неговата земја е подготвена да соработува со Иран во сите области, вклучително и испорака на храна и воено-техничка соработка, нагласувајќи дека „нема затворени теми“ во односите меѓу двете земји, дознава Белта.
За време на состанокот во потесен формат со претседателот на Иран, Масуд Пезешкијан, Лукашенко нагласи дека Минск е отворен за дијалог и конкретни договори.
„Подготвени сме да разговараме за какви било прашања, немаме тајни. Од обезбедување храна до воено-техничка соработка, сè што правиме е во интерес на нашите народи“, рече Лукашенко, додавајќи дека Белорусија и Иран се партнери кои заедно бараат нови можности во предизвиците со кои се соочуваат.
Лукашенко оцени дека посетата на иранскиот претседател, иако првично планирана за јуни, не ја изгубила својата важност.
„Дојдовте да ги посетите вашите пријатели и треба да се чувствувате како дома тука“, рече тој и се потсети на своите претходни посети на Техеран и средбите со врховниот лидер на Иран, Али Хамнеи, на кого му упати „најтопли пријателски желби“.
Пезешкијан требаше да го посети Минск во јуни, за време на Евроазискиот економски форум и состанокот на Врховниот совет на ЕАЕУ, каде што Иран е држава набљудувач.
Сепак, поради ескалацијата на безбедносната ситуација и нападите врз нуклеарната инфраструктура на Иран, неговата посета беше одложена, а потоа тој се обрати на форумот преку видео порака.