Сите членови на одборот што ја надгледува програмата Фулбрајт на американскиот Стејт департмент за меѓународна академска и културна размена поднесоа оставка поради наводно политичко мешање од администрацијата на претседателот Доналд Трамп, објави одборот вчера.
Според соопштение објавено на платформата Substack, администрацијата на претседателот Трамп нелегално го „узурпирала авторитетот“ на одборот со тоа што им одзела стипендии на „значаен број“ кандидати кои веќе биле избрани за академската 2025/2026 година, по едногодишен процес на селекција врз основа на заслуги.
Исто така, се наведува дека Стејт департментот одлучил дека 1.200 добитници на стипендии Фулбрајт мора да поминат низ „неовластен процес на преглед“ што може да резултира со дополнителни одбивања.
Членовите на одборот одлучија да поднесат оставка „наместо да дадат легитимитет на невидени дејствија за кои веруваме дека се нелегални, кои ги компромитираат националните интереси на САД и интегритетот на програмата и кои ја поткопуваат мисијата и целите што Конгресот ги постави за програмата Фулбрајт пред речиси 80 години“, се вели во соопштението.
Висок функционер на Стејт департментот ги обвини членовите на одборот за пристрасност, велејќи дека биле назначени од поранешната администрација на претседателот Џо Бајден, и ја нарече нивната колективна оставка „политички настап“ насочен кон претседателот Трамп.
„Апсурдно е да се помисли дека овие членови треба да го имаат последниот збор во процесот на аплицирање, особено кога станува збор за утврдување на академската подобност и усогласеност со извршните наредби на претседателот Трамп“, рече функционерот.
Фулбрајтовата програма, основана во 1946 година, им овозможува на американските студенти, научници, уметници, наставници и други професионалци да престојуваат во странство за да студираат, истражуваат или предаваат англиски јазик во околу 160 земји низ целиот свет.
Според официјалната веб-страница на програмата, секоја година се доделуваат приближно 8.000 стипендии во повеќето академски и научни области.
Њујорк тајмс објави дека одборот одобрил апликации за околу 200 американски професори и истражувачи кои се подготвувале да започнат со работа на универзитети и истражувачки институции во странство ова лето.
Во април, Стејт департментот требало да испрати известувања за прифаќањето на тие кандидати.
Наместо тоа, членовите на комисијата дознаа дека Канцеларијата за јавна дипломатија на Стејт департментот почнала да испраќа одбивања до научниците врз основа на предметот на нивното истражување.