Ако сте загрижени колку брзо се приближувате кон вашиот следен „голем“ роденден, имаме добри вести за вас: научниците тврдат дека ја откриле максималната возраст до која може да живее еден човек и ако сè оди добро, сè уште има многу добри години пред нас.
Статистичарите од Универзитетот Еразмус во Тилбург и Ротердам ја проучувале возраста на која починале 75.000 луѓе во Холандија во период од 30 години до 2017 година.
Сепак, тие не се фокусирале на очекуваниот животен век. Наместо тоа, тие сакале да испитаат колку долго може да живее некој ако се грижи за себе и ако неговиот живот не е прекинат од болест или други околности.
Земајќи ја предвид возраста на луѓето во студијата кога починале, тие утврдиле дека просечниот животен век на една личност е околу 90 години, објавува Индекс.
Научниците велат дека е малку веројатно дека човекот ќе живее повеќе од 115 години, но откриле дека жените имаат малку подолг животен век од мажите.
Иако максималниот животен век на жените бил 115,7 години, се проценува дека мажите би можеле да достигнат максимална возраст од 114,1 години.
Коментирајќи ги наодите од истражувањето, професорот Џон Ајнмал, еден од тројцата научници кои ја спроведоа студијата, изјави за АФП:
„Во просек, луѓето сега живеат подолго. Секако, просечниот животен век е зголемен. Сепак, самата максимална горна граница не е променета.“
И покрај резултатите од ова истражување, Ајнмал истакна дека има случаи во кои луѓето ги кршат нормите и живеат подолго од предложениот максимален животен век.
Најстариот маж досега, потврден од Гинисовата книга на рекорди, бил Јапонецот Џироемон Кимура, кој живеел 116 години.