Украинските вооружени сили го нападнаа рудникот за јаглен Белореченска во рускиот контролиран дел од источниот регион Луганск во Украина, оштетувајќи електрична трафостаница и заробувајќи 41 рудар под земја, изјави денес руски функционер.
„Сите надлежни служби преземаат чекори за спасување на рударите и враќање на електричната енергија во рудникот“, изјави Леонид Пасечник, раководител на областа, објави новинската агенција Тасс.
Тој рече дека е воспоставен контакт со рударите и дека имаат залихи од вода за пиење.
Додаде дека сите надлежни служби преземаат мерки за спасување на рударите и повторно поврзување на рудникот со електричната мрежа.
Според Тасс, по наредба на гувернерот, активностите на местото на настанот ги координираат првиот заменик-премиер на Народната Република Луганск (ЛНР) Јуриј Товтвина и министерот за енергетика и индустрија за јаглен Константин Роговенко.