Претседателот на Обединетите Арапски Емирати (ОАЕ) Мохамед бин Зајед Ал Нахјан ја прифати поканата на американскиот претседател Доналд Трамп да се приклучи на Комитетот за мир за Газа, изјави во вторник највисокиот дипломат на земјата, објави Анадолу.
Министерот за надворешни работи Абдула бин Зајед рече дека одлуката „ја одразува важноста од целосно спроведување на мировниот план на претседателот Доналд Џ. Трамп за Газа, кој е клучен за остварување на легитимните права на палестинскиот народ“.
Тој ја повтори довербата на ОАЕ „во лидерството на претседателот Трамп и неговата посветеност на глобалниот мир, како што е потврдено со историските Аврамови договори“.
Највисокиот дипломат ја изрази подготвеноста на ОАЕ „активно да придонесе во мисијата на Комитетот за мир, поддржувајќи поголема соработка, стабилност и просперитет за сите“.
Доцна минатиот петок, Белата куќа го објави формирањето на Комитетот за мир, заедно со одобрувањето на Националниот комитет за администрација на Газа, едно од четирите тела предвидени да ја управуваат транзициската фаза во енклавата.
Формирањето на одборот се совпадна со почетокот на втората фаза од прекинот на огнот, со кој беше запрена израелската воена операција во Газа, во која од октомври 2023 година загинаа повеќе од 71.000 луѓе, а повеќе од 171.000 беа ранети.
Оваа иницијатива е дел од мировниот план предложен од Трамп, кој беше усвоен од Советот за безбедност на ООН со Резолуцијата 2803 во ноември 2025 година.