Рускиот министер за надворешни работи Сергеј Лавров се сретна со кинескиот претседател Си Џинпинг во Пекинг, соопшти руското Министерство за надворешни работи.
Билатералната средба се одржа пред учеството на Лавров на состанокот на министрите за надворешни работи на Шангајската организација за соработка денес во Тјанџин.
Целта на организацијата е да дејствува како противтежа на западните организации и да ја зајакне соработката во политичките, безбедносните и трговските прашања.
На состанокот меѓу Лавров и Си беше разговарано и за подготовките за посетата на рускиот претседател Владимир Путин на Кина, по повод следниот самит на Шангајската организација за соработка, соопшти Москва.
Лавров и кинескиот министер за надворешни работи Ванг Ји разговараа за украинското прашање и „односите со Соединетите Американски Држави“ во недела.
Кина, дипломатски и економски сојузник на Русија, никогаш не го осуди рускиот напад врз Украина, ниту повика на повлекување на руските трупи.
Сепак, Пекинг редовно повикува на прекин на борбите и ги обвинува западните земји за поттикнување на конфликтот со вооружување на украинската армија.
Шангајската организација за соработка ги обединува 10 земји, вклучувајќи ги Кина, Русија, Иран, Индија и Пакистан.