Рускиот министер за надворешни работи Сергеј Лавров денеска разговараше со арапските амбасадори во Москва за ескалацијата на тензиите на Блискиот Исток, изјави денеска портпаролката на Министерството, Марија Захарова.
„Лавров одржа состанок со шефовите на дипломатските претставништва на арапските земји акредитирани во Москва, на нивно барање, кој беше испратен доцна синоќа“, рече Захарова, пренесува РИА.
Според неа, главна тема на средбата била тековната ескалација на насилството во регионот без преседан.
„Изразена е длабока загриженост поради зголемените ризици од избувнување на војна од големи размери на Блискиот Исток со разорни последици за целиот регион, наспроти позадината на одмазднички ракетен напад на Иран на израелска територија на 1 октомври“, рече Захарова.
Иранската револуционерна гарда синоќа објави дека лансирала повеќе од 100 ракети кон Израел како одговор на неодамнешните убиства на политичкиот водач на Хамас Исмаил Ханије, лидерот на Хезболах Хасан Насрала и заменик-оперативниот командант на иранската Револуционерна гарда Абас Нилфорушан, објави Ројтерс.
Израелскиот премиер Бенјамин Нетанјаху изјави, по иранскиот ракетен напад, дека Иран направил „голема грешка“ вечерва и „ќе плати за тоа“.