Неколку основни и средни училишта од Куманово се меѓу образовните установи што добија финансиска поддршка за реализација на програми насочени кон унапредување на безбедноста и благосостојбата на учениците во учебната 2025/2026 година.
Поддршката е обезбедена преку јавни повици за доделување грантови, со кои се финансираат активности поврзани со спречување на насилство и дискриминација, како и превенција од злоупотреба на алкохол, дрога и игри на среќа, но и намалување на ризиците од малолетничка делинквенција.
Покрај училиштата од Куманово, финансиска поддршка добија и основни училишта од повеќе општини низ државата, меѓу кои Аеродром, Гази Баба, Кавадарци, Карпош, Кисела Вода, Тетово, Штип и други, како и едно специјализирано училиште за ученици со посебни образовни потреби од Скопје.
Во рамки на средното образование, грантови се доделени на седум јавни средни училишта, меѓу кои и едно од Куманово, заедно со училишта од Радовиш, Штип, Битола, Берово, Неготино и Дебар.
Резултатите од јавните повици се јавно достапни, а од надлежните институции посочуваат дека ваквите програми се важен чекор кон создавање посигурна, поинклузивна и поддржувачка средина за учениците, преку навремено препознавање и адресирање на ризиците со кои се соочуваат младите.