Секторот за внатрешни работи Скопје – Единица за економски и компјутерски криминал поднесе кривична пријава против А.К.(30) од Куманово поради постоење основи на сомнение за сторено кривично дело „повреда на права од индустриска сопственост и неовластена употреба на туѓа фирма“, казниво по член 285 од Кривичниот законик.
Како што информираат од Министерството за внатрешни работи, пријавениот, како физичко лице, во текот на 2019 година набавил 40 парчиња фалсификуван накит од трговската марка „PANDORA“, која е заштитена трговска марка.
– Вака, нелегално набавените парчиња накит, чии ознаки не се оригинални, имал намера да ги продава на разни купувачи со цел да се стекне со противправна имотна корист во износ од најмалку 59.000 денари, велат од МВР.
На 28.06.2019 од страна на правното лице кое е застапник на брендот „PANDORA“ на територијата на Р.С.Македонија, било доставено барање за преземање на дејствија со кое бара проверка на сомненијата и документирање на кривичното дело.
– После тоа, полициски службеници, врз основа на судска наредба, извршиле претрес во просториите на правното лице на пријавениот, при што биле пронајдени и одземени 40 парчиња разновиден накит со ознаки „PANDORA“, појаснуваат од полицијата.
Одземениот накит бил фотографиран и фотографиите биле доставени до правното лице кое е застапник на авторски права на производите од трговската марка „PANDORA“ на територијата на РСМ, по што тие известиле дека предметите се фалсификувани.
Никола Ивановски