Осудениот крипто-измамник Роман Новак и неговата сопруга Ана беа брутално убиени откако киднаперите се обиделе да ја натераат двојката да им предадат шифри за да пристапат до богатство кое се проценува на повеќе од 430 милиони евра, објавија руските медиуми.
Двојката исчезнала на 2 октомври, откако криминалците, претставувајќи се како потенцијални инвеститори, ги намамиле во одморалиштето Хата, на околу 130 километри од Дубаи.
Последните сигнали од нивните мобилни телефони биле снимени во близина на планината Хаџар, на границата со Оман, каде подоцна биле пронајдени нивните останки.
Руските медиуми јавуваат дека Новак и неговата сопруга биле мачени еден пред друг додека киднаперите се обидувале да ги добијат шифрите за нивните криптопаричници.
Кога конечно биле доставени шифрите, сметките наводно биле празни.
По убиството, телата биле завиткани во вреќи, а киднаперите користеле индустриски растворувачи за да го забрзаат распаѓањето и да ги отстранат трагите од ДНК.
Истрагата започнала кога семејството го пријавило исчезнувањето во полицијата во Дубаи.
Новак пред исчезнувањето испратил порака до некои контакти во која тврди дека е „заглавен во планините на границата со Оман“ и дека итно му требаат 170.000 евра.
Инспекторите веруваат дека киднаперите намерно ги вклучиле нивните телефони на различни локации – во Хата, Оман и Кејп Таун – за да ја измамат потрагата.
По враќањето од Обединетите Арапски Емирати, тројца руски државјани беа уапсени во Санкт Петербург: поранешниот полицаец Константин Шахт, Јуриј Шарипов и Владимир Далекин.
Шарипов и Далекин ја признаа вината, додека Шахт ги негира обвиненијата.
На тројцата им е одреден притвор до 28 декември, а истрагата продолжува во Русија и Емиратите.
„Истрагата утврди дека убијците имале соучесници кои помогнале во организирањето на киднапирањето. Тие изнајмиле автомобили и простории во кои жртвите биле држени насилно. По убиството, сторителите се ослободиле од ножевите и личните работи на жртвите“, изјави Светлана Петренко од Рускиот истражен комитет.
Мотивот за убиството бил чисто финансиски и поврзан со крипто бизнисот на Новак.
Во 2020 година, Новак беше осуден на шест години затвор во Русија за голема измама, но по условното ослободување се пресели во ОАЕ.
Таму тој ја лансираше крипто апликацијата Fintopio, наводно собрал 430 милиони евра од инвеститорите пред повторно да биде обвинет за измама.
Пред неговото исчезнување, Новак беше под истрага за наводна кражба на 43 милиони фунти од инвеститори.
Двојката беше позната по својот луксузен начин на живот, а Новак често се фалеше со своите врски со богати луѓе, меѓу кои и Павел Дуров, основачот на Телеграм.
Руските власти велат дека се очекуваат нови апсења.