Иако американскиот претседател Доналд Трамп изјави дека „апсолутно размислува“ за повлекување на неговата земја од НАТО, на патот му стои закон од 2023 година кој поставува услов две третини од сенаторите во Конгресот на САД да се согласат со повлекувањето од Алијансата.
Американската телевизиска мрежа CNN потсетува дека станува збор за закон што заеднички го предложија тогашниот републикански сенатор, а сегашен државен секретар Марко Рубио, и демократскиот сенатор Тим Кејн од Вирџинија.
Законот е во сила од 2024 година како Закон за овластување за национална одбрана, кога на власт беше демократскиот претседател Џозеф Бајден.
За да се согласи Конгресот со повлекувањето на САД од НАТО, сите 53 републикански сенатори, како и 14 демократски сенатори, ќе мора да гласаат за него.
Само тогаш повлекувањето ќе го има потребното двотретинско мнозинство од сите сенатори.
Тоа е малку веројатно да се случи, бидејќи водечкиот републиканец во двопартиската сенатска надзорна група за НАТО, сенаторот Том Тилис, не го поддржува повлекувањето и е против, како што вели тој, да му се наштети на алијансата.
Тилис во интервју за ABC минатиот месец рече дека „фактички не е вистина“ дека Трамп – кој ја критикуваше Алијансата во двата негови мандати – може да ги повлече САД од НАТО без одобрение од Конгресот.
Трамп упати таква закана неколку пати, а ја упати и завчера.
„Претседателот на Соединетите Американски Држави не може да повлече земја од НАТО. Сега, претседателот може да го отруе бунарот. Претседателот може да го направи (НАТО) функционално нефункционален ако сака“, рече Тилис.
Овој републикански сенатор ги бранеше сојузниците на НАТО минатиот месец кога Трамп ги нарече „кукавици“ затоа што не им помагаат на САД во однос на Иран.
Тилис рече дека претседателот треба да ги праша своите врвни генерали дали би било добра идеја да ги прекине врските со НАТО.
„Тешко би било да се најде некој што мисли така, бидејќи во тоа лежи огромен, огромен ризик. НАТО-алијансата спасува американски животи, а американските животи ќе бидат изгубени во голем број без неа“, рече Тилис.
Во меѓувреме, во врска со последната изјава на Трамп дека „апсолутно размислува“ за повлекување од НАТО, се огласи Чак Шумер, првиот човек на американските демократи во Сенатот.
Шумер јасно стави до знаење преку X дека Сенатот „нема да гласа за повлекување од НАТО и за напуштање на нашите сојузници само затоа што Трамп е лут што тие нема да го следат во неговата безгрижна војна, која самиот тој одлучи да ја води“.
„Благодарност до државниот секретар Рубио за спонзорирањето на закон во 2023 година со кој се бара двотретинско мнозинство во Сенатот (за повлекување од НАТО) за да се осигури дека погубените претседатели не можат да донесуваат одлуки (за повлекување) по свои каприци“, напиша Шумер.
Со тоа тој се надоврза на објавата на Рубио на социјалните мрежи од 2023 година, во чест на усвојувањето на законот, дека „на ниту еден американски претседател не може да му се дозволи да ги повлече САД од НАТО без одобрение од Сенатот“.