Јапонија денеска поднесе протестна нота до Кина преку дипломатски канали откако четири брода на кинеската крајбрежна стража беа забележани како влегуваат во јапонските територијални води околу островите Сенкаку во Источното Кинеско Море, нарекувајќи го инцидентот „неприфатлив“.
Главниот секретар на кабинетот Јошимаса Хајаши рече дека последниот упад е „кршење на меѓународното право“, ветувајќи решителен одговор на таквите кинески акции во одбрана на територијалните води и воздушниот простор на Јапонија, објави Kyodo News.
Островите Сенкаку, под управа на Јапонија, но за кои претензии има и Кина, остануваат извор на тензии меѓу овие азиски соседи.
Четири бродови на кинеската крајбрежна стража почнаа да навлегуваат во водите во близина на ненаселените островчиња околу 10 часот и тргнаа околу пладне, рече Хајаши.
Ова беше втор упад на кинески бродови во јапонските територијални води околу островот оваа година.
Тоа, исто така, дојде откако јапонскиот премиер Шигеру Ишиба и американскиот претседател Доналд Трамп минатата недела потврдија дека нивниот билатерален безбедносен договор, според кој САД помагаат во одбраната на Јапонија, ги вклучува и островите Сенкаку, според Kyodo News.
„Навистина е за жалење и неприфатливо што бродови на кинеската крајбрежна стража влегоа во јапонските води околу островите Сенкаку“, рече Хајаши.
„Ќе дадеме се од себе да спроведеме активности за предупредување и надзор и да и одговориме на Кина мирно, но цврсто“, додаде тој.