Кинеските имиграциски власти запленија вкупно 2,42 тони наркотици во операции спроведени во граничните области и пристаништата во текот на првата половина од годината, соопшти Националната администрација за имиграција (НИА).
Според извештајот на НИА, до 25 јуни се решени 205 случаи поврзани со шверц со дрога, а уапсени се 262 лица, објави Ксинхуа.
Меѓу нив имало 38 поголеми случаи во кои биле запленети повеќе од десет килограми дрога по случај.
Во соопштението се нагласува дека резултатите се постигнати благодарение на интензивирањето на мерките за надзор и примената на нови полициски методи, вклучително и употреба на анализа на податоци од голем обем, следење на цели синџири за шверц, како и зголемени безбедносни контроли на граничните премини.
НИА објави дека кинеските власти ќе продолжат со кампањата „под висок притисок“ против трговијата со дрога, со фокус на следење на шверцерските патишта, разоткривање на криминалните мрежи и зајакнување на соработката со соседните земји.