Кина одбележува стогодишнина од владејачката Комунистичка партија.
Нејзините официјални лица го нагласуваат растечкото влијание на Кинеската комунистичка партија во странство и успесите во борбата против корупцијата дома.
Земјата забележа огромни подобрувања во животниот стандард во последните четири децении, придружени со зголемување на меѓународното економско и политичко влијание.
Претседателот Си Џинпинг го поздрави „новиот свет“ создаден од кинескиот народ и ги предупреди странските сили кои се обидуваат да ја понижат Кина дека „ќе ги удри во глава“.
По прелетувањето и акробатиката на кинеското воено воздухопловство, претседателот Си за време на едночасовниот говор на плоштадот Тјенанмен вети дека ќе ја зајакне кинеската армија и ќе спроведе обединување со Тајван.
Според него, социјалната стабилност ќе се обезбеди во Хонг Конг, со заштита на кинеската безбедност и суверенитет.
„Преку постојаните напори на целата партија и целата нација, ја постигнавме првата цел за првите 100 години – градење на умерено просперитетно општество на секој начин. Ова значи дека го решивме проблемот со апсолутна сиромаштија во Кина и сме сега преземајќи сигурни чекори кон модерна социјалистичка земја од секој поглед. Ова е големо и славно достигнување за кинеската нација, за кинескиот народ и за Комунистичката партија на Кина “, рече претседателот Си Џинпинг.
Претседателот и партијата уживаат популарност поради ефективната борба против пандемијата и активната улога што ја игра Кина на глобалната политичка и економска сцена.
Сепак, официјален Пекинг е изложен на надворешни критики за строгиот однос кон Хонг Конг и кршењето на правата на припадниците на муслиманското етничко малцинство Ујгур во провинцијата Ксинџијанг, но и за влошената демографска состојба што може да го загрози долгорочниот економски раст.
Претседателот Си рече дека кинескиот народ никогаш нема да дозволи странските сили да се однесуваат насилно, да ја понижуваат и покоруваат Кина.
„Кој би се осмелил да проба нешто слично – крваво би ја скршил главата од Големиот челичен ѕид, кој е изграден од милијарда и 400 милиони членови на нашиот кинески народ“, истакна Си.
Кина е втора по големина економија во светот, а милиони луѓе се извлечени од сиромаштија.
Партијата ја доби поддршката од домашната јавност со одржување на економскиот раст и воспоставување позиција во непријателската меѓународна клима.
Комунистичката партија имала 91,9 милиони членови во 2019 година, што е 6,6 проценти од кинеското население.
Со Кина владее од 1949 година.