Канадскиот бизнисмен Мајкл Спавор, чиј притвор во Кина канадскиот премиер го опиша како „произволен“, е осуден на 11 години затвор за шпионажа, објави денеска АФП, додавајќи дека случајот дополнително ќе ги влоши односите меѓу Пекинг и Отава.
Спавор беше уапсен кон крајот на 2018 година под обвинение за загрозување на националната безбедност, набргу откако канадските власти, по налог на САД, ги уапсија финансискиот директор на „Хуавеј“ и ќерката на основачот на таа кинеска компанија, Менг Ванжоу, во Ванкувер.
Мајкл Спавор беше „прогласен за виновен за шпионажа и кражба на државни тајни и осуден на 11 години затвор“, соопшти судот во Дандонг во североисточна Кина, на границата со Северна Кореја.
Затворени судски постапки
Судењето се одржа зад затворени врати, што е вообичаено во Кина во случаи на шпионажа.
Уште еден Канаѓанец, поранешниот дипломат Мајкл Ковриг, исто така беше приведен, а потоа притворен истовремено со Спавор под слични обвиненија.
Во декември 2020 година, кинеското Министерство за надворешни работи објави дека ја завршиле истрагата за Ковриг и Спавор и дека случајот е предаден на обвинителството.
Трудо: Тоа е произволен притвор
Премиерот Трудо го осуди „произволниот притвор“ на двајцата Канаѓани и „недостатокот на транспарентност“ на кинеските власти.
Менг Ванжоу е уапсена на барање на Соединетите Американски Држави, кои ја сомничат за банкарска измама и бараат екстрадиција од Канада.
Кина постојано бара ослободување на Менг и ја предупредува Канада дека може да се соочи со последиците од помошта на САД во случајот Менг.
Казната на Спавор доаѓа пред појавувањето на Менг пред канадскиот суд до 20 август, за последно во серијата сослушувања за можна екстрадиција.
Во следните неколку месеци не се очекува одлука, а во случај на жалба на пресудата, постапката може да потрае неколку години.
Кинескиот суд во вторникот го осуди Канаѓанецот Роберт Лојд Шеленберг на смрт за трговија со дрога.