Кинеската амбасада во Канада денеска го осуди наводното мешање на владата во Отава во внатрешните работи на Хонг Конг, откако кинеските власти на територијата издадоа налози за апсење против шест активисти, меѓу кои и двајца канадски државјани.
Кинеската амбасада ја повика Канада да го почитува кинескиот суверенитет и владеењето на правото, како и да престане да се „меша“ во работите на Хонг Конг, пренесува Ројтерс.
„Прашањата во Хонг Конг се чисто внатрешни работи на Кина“, се вели во соопштението на амбасадата.
Полицијата во Хонг Конг во вторникот издаде налози за апсење на шест активисти со седиште во странство, вклучително и Канаѓанецот Џо Теј, роден во Хонг Конг, кој оттогаш ја обвини Кина за мешање во внатрешните работи на Канада, според Радио Канада.