Кина ги критикуваше активностите на Западот во украинската криза и рече дека обезбедувањето офанзивно оружје за Киев „само ќе го продолжи и ескалира конфликтот“ и дека последиците од воведените санкции кон Москва најмногу ги чувствуваат земјите кои не се страни во конфликтот.
Постојаниот претставник на Кина во Обединетите нации, Џанг Џун, рече дека изгледите за продолжен конфликт во Украина се „загрижувачки“ и ги повика страните да вложат напори за нивно прекинување.
Во своето обраќање пред Советот за безбедност на ОН, тој ги повика Русија и Украина да се одлучат за дијалог и преговори и континуирано да работат на намалување на разликите, за да се исполнат условите за прекин на огнот, пишува британскиот весник.
Сите страни во конфликтот во Украина треба строго да се придржуваат до меѓународното хуманитарно право и да направат се што можат за да ја олеснат евакуацијата и хуманитарната помош за цивилите, изјави постојаниот претставник на Кина во ОН на состанокот на Советот за безбедност за хуманитарната ситуација во Украина во вторникот.
Кинескиот амбасадор ги критикуваше и западните лидери во врска со испораката на оружје за Украина и актуелните санкции против Русија.
„Продолжувањето со испраќање повеќе офанзивно оружје нема да донесе мир. Тоа само ќе го продолжи и ескалира конфликтот и дополнително ќе ја влоши хуманитарната катастрофа“, нагласи Џанг.
За санкциите што западните земји и ги воведоа на Москва, тој рече дека земјите во развој „го носат најголемиот товар“.
Треба да обрнеме внимание и да го елиминираме негативното влијание на санкциите.
„Сеопфатните и неограничени санкции имаат сериозни последици, при што најголемиот дел го носат земјите во развој. Огромен број земји во развој кои не се конфликтни плаќаат висока цена. Ова не е ниту фер, ниту разумно“, изјави кинескиот дипломат, пренесува Гардијан.