Странските туристи полека се враќаат во Кина откако земјата ја олабави својата визна политика до невиден степен.
Граѓаните на 74 земји сега можат да влегуваат во Кина до 30 дена без виза, што е голем скок во однос на претходните регулативи.
Владата постојано го проширува безвизниот режим во обид да го поттикне туризмот, економијата и нејзината мека моќ.
Повеќе од 20 милиони странски посетители влегле без виза во 2024 година – речиси една третина од вкупниот број и повеќе од двојно во однос на претходната година, според податоците од Националната служба за имиграција.
– Ова навистина им помага на луѓето да патуваат бидејќи аплицирањето за виза и поминувањето низ целиот процес е толку комплицирано – рече Георги Шавадзе, Грузиец кој живее во Австрија, за време на неодамнешната посета на Храмот на небото во Пекинг.
Додека повеќето туристички места се уште се преполни со многу повеќе домашни туристи отколку странци, туристичките агенции и туристичките водичи сега се подготвуваат за поголем прилив во очекување на летните туристи кои доаѓаат во Кина.
– Практично сум преоптоварен со тури и едвај можам да следам сè – вели Гао Џун, искусен туристички водич кој зборува англиски јазик со над 20 години искуство.
За да ја задоволи растечката побарувачка, тој започнал нов бизнис за обука на сите што се заинтересирани да станат туристички водичи што зборуваат англиски.
– Едноставно не можам сè да направам сам – рече тој.
По укинувањето на строгите ограничувања поради COVID-19, Кина ги отвори своите граници за туристите на почетокот на 2023 година, но само 13,8 милиони луѓе ја посетија Кина таа година, помалку од половина од 31,9 милиони во 2019 година, последната година пред пандемијата.