Најмалку 21 лице загина, а 30 се водат како исчезнати во лизгање на земјиштето во западна Кенија, кое започна по обилните дождови, објави денес министерот за внатрешни работи на земјата, Кипчумба Муркомен.
– За денес ги прекинавме операциите за пребарување и спасување. Потврдена е смрт на 21 лице, додека повеќе од 30 се уште се водат како исчезнати. 25 лица се сериозно повредени во лизгањето на земјиштето и се однесени во Елдорет со хеликоптер, рече тој, според RFI.
Муркомен додаде дека воени и полициски хеликоптери се распоредени за да помогнат во спасувачките операции.
Според него, потрагата ќе продолжи утре, а на локалната заедница ѝ помагаат армиски и полициски екипи.
Во тек се подготовки за испорака на повеќе храна и основни потреби на ранливото население.
Стотици луѓе загинаа во последните години во лизгање на земјиштето и поплавите во Кенија, а научниците велат дека климатските промени предизвикуваат поинтензивни и чести екстремни временски услови.
Во најтешките несреќи во текот на минатата година, 61 лице загина во лизгање на земјиштето и ненадејни поплави во централна Кенија, потсетува Ројтерс.