Прелиминарниот извештај покажува дека влегувањето на руски беспилотни летала во полскиот воздушен простор е намерно и не е случајно, изјави високата претставничка на ЕУ за надворешна политика и безбедност, Каја Калас.
– Руската војна ескалира, не завршува. Треба да ги зголемиме трошоците за Москва, да ја зајакнеме поддршката за Украина и да инвестираме во европската одбрана. ЕУ игра голема улога и ние ќе поддржиме иницијативи како што е одбранбената линија Источен граничен штит – изјави Калас на мрежата X.
Таа додаде дека е во контакт со генералниот секретар на НАТО, Марк Руте, и полскиот министер за надворешни работи, Радек Сикорски.
Полските власти објавија порано утрово дека руски беспилотни летала влегле во полскиот воздушен простор и дека полските воздухопловни сили користеле оружје за да ги соборат.
Полската армија објави дека влегувањето на беспилотни летала во воздушниот простор на земјата за време на рускиот напад врз Украина е „чин на агресија“ што ја загрози јавната безбедност и бараше уништување на згради, пренесува Ројтерс.
Полскиот премиер Доналд Туск изјави дека Варшава го информирала генералниот секретар на НАТО, Марк Руте, за акциите што Полска ги презела против руските беспилотни летала и дека операцијата против беспилотните летала е сè уште во тек.