Јужнокорејската полиција во понеделник наутро започна нов обид за претрес на претседателската канцеларија како дел од истрагата за воената состојба воведена на 3 декември од страна на отповикуваниот јужнокорејски претседател Јун Сук Јеол.
Инспекторите ќе се обидат да запленат документи и снимки од камерите за надзор, објави Јонхап, истакнувајќи дека претходните обиди за претрес биле главно неуспешни поради противењето на претседателската служба за безбедност.
Јун ја помина својата прва ноќ во затвор во Сеул, откако беше официјално уапсен во неделата и му беше одреден притвор до 20 дена, пренесува Танјуг.
Тој е задржан во самица со големина од околу 12 метри квадратни, што е поголема од вообичаената единечна ќелија од 3,4 метри квадратни, соопшти неименуваниот затвор, според јужнокорејската агенција.
Јун беше официјално уапсен рано во неделата, откако судот му одреди притвор до 20 дена поради накратко воведување воена состојба во земјата на 3 декември.
Јун е првиот јужнокорејски претседател кој е приведен во модерната историја на земјата, пишува Јонхап.
Судијата на Окружниот суд во Сеул одобри налог за апсење на Јун, наведувајќи го ризикот од уништување докази, а со издадениот налог, истражителите можат да го задржат Јун до 20 дена, вклучувајќи ги и деновите што тој веќе ги поминал во притвор од средата кога тој беше уапсен.
Канцеларијата за истраги за корупција (ЦИО) соопшти дека планира да му го предаде притворот на Јун на обвинителството по 10 дена.
Обвинителството се очекува дополнително да го испита и да го обвини пред да истечат 20-те дена.
Јун ги повика своите приврзаници во неделата да ги изразат своите мислења на мирен начин, а исто така побара од полицијата да покаже толеранција, рече неговиот адвокат.
Адвокатот рече дека Јун бил шокиран од насилниот инцидент кога неговите поддржувачи упаднале во Окружниот суд во Сеул рано утринава и ги искршиле прозорците.
Јун беше обвинет за бунт и злоупотреба на моќта при прогласувањето воена состојба на 3 декември.
Тој се појави пред судот во саботата, кој ги разгледа аргументите за и против неговото апсење.
Јун зборуваше 40 минути за време на речиси петчасовното сослушување, а исто така даде и петминутна завршна изјава.
Јужнокорејскиот парламент го отповика Јун на 14 декември за воведување воена состојба на 3 декември.