Владата на Јужна Африка ги предупреди девојките да не се занесуваат со кампањи за регрутирање на социјалните медиуми кои промовираат можности за работа во странство.
Ова доаѓа откако голем број видеа од јужноафрикански инфлуенсери кои рекламираат работа за млади жени во Русија станаа вирални.
Голем број млади јужноафрикански жени се невработени, а многумина очајно бараат работа.
Властите истражуваат промотивно видео од инфлуенсерката Цјан Буџи, кое сега е отстрането од нејзиниот профил.
Во тоа видео, таа ја опишува двегодишната програма „Старт“ за млади жени на почетокот на нивните кариери кои сакаат да стекнат професионални вештини.
Нема индикации дека инфлуенсерката направила нешто нелегално
Видеото е снимено во Татарстан, Русија, а на гледачите им се прикажува сместувањето каде што ќе престојуваат работничките.
Инфлуенсерката, чие вистинско име е Онор Зума, ја опишува програмата како „нов почеток“, додавајќи дека „очигледно девојките тука се третираат фер, Африканци, Азијци, Латиноамериканци“.
Буџи, која има 1,7 милиони следбеници на ТикТок, исто така објаснува дека девојките ќе научат и да зборуваат руски.
Не е јасно кои професии ќе ги следат младите жени, но рекламираната програма е насочена кон девојки на возраст меѓу 18 и 22 години.
Нема индикации дека Буџи направила нешто нелегално. Таа не одговори директно на критиките со кои се соочи за време на викендот.
Една од нејзините последни објави на Инстаграм ја прикажува во авион како пие шампањ.
„Нозете истегнати, шампањ налеан, драмата игнорирана“, рече таа.
Шефот на јавна дипломатија: Не наседнувајте на непроверени понуди
Јужноафриканската влада е „крајно загрижена“ за трендот на користење на влијателни лица за промоција на бизнис во странство, потврди шефот на јавна дипломатија Клејсон Мониела.
Во објава на X, тој ги предупреди младите луѓе, особено девојките, „да не наседнуваат на непроверени понуди за работа во странство“.
„Ако нешто ви изгледа премногу добро за да биде вистина, побарајте второ мислење“, напиша тој.
Некои наводно завршиле во фабрика за оружје
Постојат тврдења дека некои од оние што биле регрутирани да работат во Татарстан завршиле работејќи во фабрика за оружје, правејќи беспилотни летала што биле користени во војната на Русија во Украина.
Извештајот на Глобалната иницијатива против транснационалниот организиран криминал објавен во мај се занимаваше со регрутирање луѓе за програмата „Старт“.
Во извештајот се наведува дека „потенцијалните регрути се намамуваат да учествуваат под лажни изговори во врска со природата на работата, условите за работа и образовните можности“, а вистинската цел на помошта е „програма за производство на дронови“.
„Повеќето од регрутите работат директно во производство на дронови, додека други работат како помошен персонал – чистачи и угостители“, се вели во извештајот.
Cyan boujee Promoting The Alabuga Start program in Russia pic.twitter.com/ZLFUbfAHPD
— Mzansi Gossip (@Mlimo02) August 23, 2025