Јорданската армија денес објави дека нејзините противвоздушни системи пресретнале две балистички ракети кои биле насочени кон земјата.
Жителите на главниот град Аман изјавија дека слушнале гласни експлозии и сирени за воздушен напад, објави CNN.
Сирените продолжуваат да се слушаат во и околу Ерусалим и низ северен Израел, среде бран ирански напади со балистички ракети.
Досега нема извештаи за повредени, објави The Times of Israel.
Се слушаат експлозии додека израелските одбранбени сили ги активираат противракетните системи во обид да ги спречат нападите.
Иранскиот корпус на Исламската револуционерна гарда (ИРГК) објави дека го започнал „првиот бран напади со ракети и беспилотни летала од големи размери“ против Израел, објави новинската агенција Тасним.
Во соопштението се наведува дека нападите дошле „како одговор на непријателската и криминална агресија на непријателот против Исламската Република Иран“.
Израелскиот министер за одбрана Израел Кац претходно денес изјави дека Израел започнал превентивен напад врз Иран за да ги елиминира заканите за безбедноста на земјата и дека е прогласена вонредна состојба низ целата земја.
Извор потврди за Си-Ен-Ен дека израелскиот напад врз Иран бил координиран со Соединетите Американски Држави.