Јапонците шокирани од атентатот на поранешниот премиер Шинзо Абе го посетија местото на трагедијата во западниот град Нара.
Автомобилот со телото на Абе пристигна во Токио. Абе ќе биде погребан на 12 јули.
Во јапонските медиуми се појавуваат се повеќе детали за животот на Тецуја Јамагами, поранешниот морнарец кој вчера во Нара го уби поранешниот јапонски премиер Шинзо Абе.
Три години служел како стрелец на воен брод, а во последните години работел како возач на виљушкар.
Во изминатите неколку месеци тој ја напуштил својата работа и се чини дека планирал напад врз верска организација.
На полицијата ѝ рекол дека чувствувал лична огорченост кон поранешниот премиер Абе, но дека тоа не е од политичка природа, туку дека Абе и неговите соработници ја поддржуваат таа религиозна група од градот Нара.
Откако дознал дека Абе доаѓа во Нара, Јамагами се откажал од нападот на верската организација и решил да се обиде да го убие поранешниот шеф на јапонската влада, во што и успеал.
„Атентатот на Абе е напад врз демократијата и слободата на говорот“
Властите во Јапонија се шокирани и атентатот на Абе го сфатија како напад врз демократијата и слободата на говорот, бидејќи утре во земјата се одржуваат избори за Горниот дом на парламентот.
Јапонскиот премиер Фумио Кишида го осуди злосторството како неприфатлив варварски чин.
Граѓаните се многу изненадени и исплашени, а својот гнев го искажуваат и кон обезбедувањето, но и кон болницата каде што е префрлен Абе.
Изненадувањето настана и затоа што ретко се случуваат атентати на политичари, а последниот атентат се случи во 1960 година.
Освен тоа, огненото оружје е строго забрането во Јапонија, а пукотниците се многу ретки, па Јапонците се изненадени и од фактот што Абе бил нападнат со огнено оружје кое сторителот сам го направил.
Абе одржа говор пред мал број луѓе, што, како што јави дописникот на РТС од Јапонија, Илја Мусулин, е вообичаено за таа земја во пресрет на изборите.
Шинзо Абе ќе биде погребан на 12 јули во големиот храм Зојоџи во Токио.