Јапонскиот парламент ја избра ултраконзервативната Санае Такаичи за прва жена премиер во земјата, еден ден откако нејзината партија постигна коалициски договор со нов партнер за кој се очекува да го помести владејачкиот блок понадесно.
Такаичи ќе го замени Шигеру Ишиба и ќе го заврши тримесечниот политички вакуум и конфликт што следеа по катастрофалниот пораз на Либерално-демократската партија (ЛДП) на изборите во јули.
Ишиба, кој беше премиер само една година, поднесе оставка заедно со својот кабинет претходно во текот на денот, отворајќи го патот за неговиот наследник.
Алијансата на ЛДП со десничарската Јапонска партија за иновации, со седиште во Осака, или Ишин но Каи, го обезбеди нејзиното доаѓање како премиер, бидејќи опозицијата не беше обединета.
Алијансата на Такаичи сè уште нема мнозинство во двата дома на парламентот и ќе треба да се додворува од други опозициски групи за да донесе какви било закони, ризик што би можел да ја направи нејзината влада нестабилна или краткотрајна.
„Политичката стабилност е од суштинско значење сега“, рече Такаичи во понеделник на церемонијата на потпишување со лидерот на ЈИП, гувернерот на Осака, Хорофуми Јошимура.
„Без стабилност, не можеме да промовираме мерки за силна економија или дипломатија“, рече таа.
Двете партии потпишаа коалициски договор врз основа на политики што ги нагласуваат силните и националистички ставови на Такаичи.
Нивниот договор беше постигнат во последен момент откако либералните демократи го загубија својот долгогодишен партнер, Комеито, кој има поблаг и поцентристички став.
Разделбата меѓу двете партии се закани да доведе до промена на владата за ЛДП, која владееше со Јапонија речиси без прекин со децении.
64-годишната Такаичи ќе го претстави кабинетот со голем број сојузници на Тара Асо, највлијателната во ЛДП, и други кои ја поддржаа на гласањето за лидерство.
Нема да има министерски места од партијата ЈИП во владата на Такаич сè додека таа партија не се убеди во своето партнерство со ЛДП, рече лидерот на партијата Јошимура.
Иако е првата жена што ја извршува функцијата премиер на Јапонија, таа не брза да промовира родова еднаквост или разновидност, пишува АП.
Таа е меѓу јапонските политичари кои ги блокираа мерките за унапредување на жените.
Jа поддржува само машката сукцесија на царското семејство и е противник на истополовите бракови и дозволата за посебни презимиња за брачните парови.
Таа е штитеничка на убиениот поранешен премиер Шинзо Абе и се очекува да ги следи неговите политики, вклучувајќи посилна војска и економија, како и ревизија на пацифистичкиот устав на Јапонија.
Со слаба влада, не е јасно колку ќе може да се постигне.